Buorisboahtem SAMLA bloaggaj!
Dánna diedojt juohkep geldulasj åvddånimij birra prosjevtan gånnå galggap værmádagáv åvddånahttet unna sámegielaj åvdås. Værmádagá ulmme l åhpadiddjijt, dutkijt ja mierrediddjijt tjoahkkit buorebut ja álkkebut aktisattjat bargatjit ja gielaj ælládimijt doarjotjit.
Gidávejabiejven snjuktjamáno 21. b. 2025, tjåhkanin SAMLA prosjæktaoassálasste vuostasj tjåhkanibmáj, mij lij workshop nehta baktu man tiemá lidjin “Unna sámegielajt guoradallat ja åhpadit gålmån rijkan”. Dát workshop dutkijt tjoahkkij gudi barggi dáj 4 unna sámegielaj ma li maŋen SAMLA-værmádagán: oarjjelsámegiella, julevsámegiella, anársámegiella ja gieldasámegiella. Oassálasste gudi båhtin vuostasj tjåhkanibmáj lidjin Markus Juutinen (Giellagas instituhtas Oulu universitiehtan), Marja-Liisa Olthuis (Giellagas instituhtas Oulu universitiehtan), Michelle Francett-Hermes (Giellagas instituhtas Oulu universitiehtan), Miika Lehtinen (Giellagas instituhtas Oulu universitiehtan), Camilla Olafsson Boatas (Gasskauniversitiehtas), David Kroik (Nuortta universitiehtas/Gasskauniversitiehtas), Inger Johansen (Nuortta universitiehtas), Minerva Piha (Nuortta universitiehtas), Bruce Morén-Duolljá (Nuortta universitiehtas), Hanna Danbolt Ajer (Nuortta universitiehtas) ja værmádakjådediddje Ingvill B. Åberg (Nuortta universitiehtas).
Muhtem oajvvetjalmostibme vuostasj tjåhkanimen lij oahpásmuvvat juohkka giela dálásj dilláj ja juogadit dábálasj hásstalusájt, duola degu åhpadiddje- ja oahpponævvovádnudimijt ja struktuvralasj hásstálusájt åhpadussuorgen. Valla sierraláhkáj tjalmostijma ájggeguovddelis åvddånimijt, buorre barggovuogijt ja boahtteájggásasj plánajt iesjgeŋga gielaj åvdås.
Næhttatjåhkanime álgon oahpásmuvájma nubbe nubbáj ja mijá barggosuorgijda dájn unna sámegielajn, åvddål gå åvdåstiddje juohkka giellajuohkusis åvddånbuktin. Tjielgas lej jut moadda hásstalusá guosskin iesjgeŋga giellajuohkusijda. Akta aktisasj vásádus la man gássjel ja dábálasj la barggat gasskaájggásasj prosjevtaj. Huoman gávnnuji prosjevta giellaåhpadusán ja åhpadiddjeåhpadusán majn li læhkám ájnas ja guhkesájggásasj vájkkudusá. Sæmmi båttån gå ådå, ávkálasj ja sjuggelis prosjevta åvddånahteduvvi, oames barggovuoge – degu “giellaáhkojt ja -ádjájt” gåhttjot guossen mánájgárdijda ja klássalanjájda – li vilá ávkken ja árvvon aneduvvam. Rájájrasstididdje prosjevta Sámen ma li juo guhkev vuordeduvvam li aj álgaduvvamin, duola degu prosjækta Oummu rââst raaj – People cross the borders (2024–2026). Prosjevta ulmme l “gieldasámegielav ja gieldasáme kultuvrrabirrasav nannit ja aktisasj giellaarienáv ásadit gieldasámij åvdås Vuonan ja Suoman” (https://www.interregaurora.eu/approved-projects/oummu-raast-raaj-people-cross-the-borders/ ).
Oassálasste aj dágástallin boahtteájge lávkijt ja gåktu SAMLA máhttá viehkken liehket gasskasasj doarjov hábmedittjat. Boahtte ásadus majt SAMLA la plánimin la rijkajgasskasasj seminárra gånnå prosjæktaoassálasstijt, åhpadiddjijt ja åhpadiddjeoahppijt duosstop ja tjoahkkit ájádusájt juogadittjat “rijkajgasskasasj ja buohtastahttem perspektijva iemeálmmuk gielaoahppama birra”. Tjuovo blåkkav ienep diedojt oadtjot!
Vuojnnalip ruvva! Uáinimáid! Vuõinnlõõttâp! Rætnoe gaavnesjibie! See you soon!
SAMLA bieles,
Michelle Francett-Hermes
Doktorgrádastipænndiáhtta sáme kultuvran Giellagas instituhtan, Oulu universitiehtan