SAMLA lij projeʹktt, mâʹst leäʹp raajjmen uʹcc sääʹmǩiõli õhttsažtuâjjsääiʹm. Mieʹrren lij puʹhtted õʹhtte uʹčteeʹlid, mättʼtõõđjid, tuʹtǩǩeeʹjid da mieʹrreeʹjid.
Pâʹsslašttâm-mannu 21. peeiʹv 2025 SAMLA oummu kaaunõʹtte vuõssvuâra neʹtt-tuâjjpääʹjest ”Uʹcc sääʹmǩiõli tuʹtǩǩummuš da mättʼtummuš kolmmân jânnmest.” Tän neʹtt-tuâjjpäjja puõʹtte nellj uʹcc sääʹmǩiõl tuʹtǩǩeei: saujjsääʹmǩiõl, juuʹlevsääʹmǩiõl, aanrõšǩiõl da sääʹmǩiõl. Mieʹldd leʹjje nellj oummu Oulu universiteeʹtt Giellagas-instituuttâst: Markus Juutinen, Marja-Liisa Olthuis, Michelle Francett-Hermes da Miika Lehtinen, di čiččâm oummu Taarr da Ruõcc universiteeʹttin: Camilla Olafsson Boatas (Mittuniversitetet), David Kroik (Nord University/Mittuniversitetet), Inger Johansen (Nord University), Minerva Piha (Nord University), Bruce Morén Duolljá (Nord University), Hanna Danbolt Ajer (Nord University) da õhttsažtuâjjsääiʹm jååʹđteei Ingvill B. Åberg (Nord University).
Tän vuõssmõs kaaunõõttâm mieʹrren leäi tobdstõõttâd tõõzz, mäʹhtt koon-i ǩiõlâst ååʹn mâânn. Toʹben mainsteš, måkam vaiggâdvuõđ ǩiõlin lie, ouddmiârkkân vääʹnn uʹčteeʹlin da mättʼtem-materiaalin da institutionaalʼla vaiggâdvuõđ. Jeäʹnab kuuitâǥ leäi teädd tõʹst, måkam ääʹšš lie šõddâm mõõnni ääiʹj, måkam šiõǥǥ nääʹl lie hoʹhssjum da måkam äiggmõõžž lie puõʹttiäigga.
Neʹttkaaunõõttmõš aaʹlji nuʹtt, što tobdstõõđim kueiʹmm kuõiʹmineen da kueiʹmm kueiʹmmen tuõjju uʹcc sääʹmǩiõlivuiʹm. Tõn mâŋŋa juõʹǩǩ ǩiõl tuʹtǩǩeei õõʹni saakkvuâr jiijjâs ǩiõlâst. Meeʹst leʹjje jiânnai seämmanallšem vaiggâdvuõđ, ouddmiârkkân tõt, što tuâjj täujja mâânn projeeʹkti mieʹldd. Kuuitâǥ projeeʹkt lie ǩiõllmättʼtõõzzâst da uʹčteeʹlškooultõõzzâst vaaiktam jiânnai da kuuʹǩǩ. Ååʹn leät raajjmen ođđ, hoʹhssjeeʹjes projeeʹktid ja seämmast vuäʹmm šiõǥǥ nääʹl juätkkje, mâʹte ”ǩiõllääkkai da -ääʹjji” kõʹllʼjummuš peiʹvvhååidast da škooulčiâssin. Ođđ jânnmi kõskksa projeeʹkt lie še äʹlǧǧmen, mâʹte Oummu rââst raaj – People cross the borders (2024–2026). Tän projeeʹkt mieʹrren lij ”nânsmâʹtted sääʹmǩiõl da sääʹmkulttuurpirrõõzz da raajjâd õhttsa ǩiõllââʹnnempirrõõzz saaʹmid, ǩeäk jälste Taarrjânnmest da Lääʹddjânnmest.” (https://www.interregaurora.eu/approved-projects/oummu-raast-raaj-people-cross-the-borders/ ).
Kaaunõõttmõõžžâst mainsteš puõʹttiääiʹjest še. Smiõttim, što mäʹhtt vueiʹttep tueʹrjjeeškueʹtted kueiʹmm kueiʹmmen SAMLA veäkka. Tän mâŋŋa SAMLA äigg jäʹrjsted meeraikõskksa seminaar, koozz lie koččum SAMLA oummu, uʹčteeʹl da uʹčteeʹlmättʼtõõđi. Toʹben äʹššen lij ”meeraikõskksa da veʹrddõõlli perspektiiv alggmeerǩiõli mättjummša.” Lââʹssteâtt lij pueʹttmen!
Uáinimáid! Vuõinnlõõttâp! Vuojnnalip ruvva! Rætnoe gaavnesjibie! See you soon!
Õhtt SAMLA oummuin,
Michelle Francett-Hermes
Sääʹmkulttuur naggtõsǩeʹrjjtuʹtǩǩeei Giellagas-instituuttâst, Oulu universiteeʹttest