Mubpie bielie prosjekteste sæjhta goerehtidh guktie jïh mennie mieresne mubpie veartenedåara aalkoeåålmegi identiteeth baajnehti. Akte åejvieulmie lea doh åarjelsaemien dååjresh akten veartenevijries ektiedimmien sïjse bïejedh, jïh dejtie tjoevkesisnie aktede komparatijve perspektijvijste goerehtidh. Joekoen sïjhtebe Noerhte-Amerikan aalkoeåålmegi dååjrehtimmieh vuartasjidh.
Mubpene veartenedåaresne gellie tjirkijh ovmessie aalkoeåålmegijstie lin eadtjohke meatan dåaroemisnie. Dah lin meatan sïejhme goevtesinie militære dåarafoevine, jïh aaj jïjtsh goevtesh tseegkin. Jeenjesh lin meatan joekehts såarhts vuastalimmiebarkojne jeatjahlaakan – goh dennie nazi-ritneme Nöörjesne. Naemhtie almetjh, mah daamtaj lin jïjtjemse vaenie nasjonaalestaatine identifiseereme, læjhkan sïjse geasalgovvin juktie nasjonaalestaaten åvteste gæmhpodh dennie veartenevijries vigkesne Europan luvhtie Åarjel-luvlie-Asijen gåajkoe, Afrikan luvhtie Suajamearaoen gåajkoe. Muvhth aalkoeåålmegh militæredïenesjen sïjse geasalgovvin, jeatjah aejkien dåaroe dej gåajkoe bööti goh ritneme. Man jïjnjem jïh guktie almetjh åarjelsaemien seabradahkijste dåaran sïjse geasalgovvin? Mennie mieresne jïh guktie årrojh aalkoeåålmegeseabradahkijste geasalgovvin dåaran sïjse goh sivijle årrojh abpe veartenisnie, jïh dej dååjresh joekehtadtin dååjresijstie dej almetji luvnie mah idtjin aalkoeåålmegeseabradahkese govlehtovvh.
Gellien aejkien veartenedåara sovmehtimmieh vedti aalkoeåålmegh dagke idtjin dejtie seamma lojaliteetebaantide damth goh jeatjah almetjh laantesne, jïh daate meehti aajhtojne vuajnalgidh. Fåantoe meehti båeries histovrijen vuastalimmieh årrodh, jallh aalkoeåålmegi aerpievuekien dajve maaje nasjonaalestaati raasti rastah juhtin. Guktie mubpie veartenedåara baajnehti guktie åarjelsaemieh sijjen identiteetem dååjrin? Guktie mojhtesh åarjelsaemien dåaraeadtjohkevoeten bïjre gorresovveme åarjelsaemien seabradahkine jïh åarjelsaemien seabradahki ålkolen, jïh guktie daah mojhtesh baajnehtamme?