Prosjekten ulmie lea gïengelåbpoe goerkesem åadtjodh åarjelsaemien histovrijistie jïh kultuvreste. Daate prosjekte goerehte guktie ovmessie aktöörh leah åarjelsaemien mojhtesekultuvrem hammoedamme, dam soptsestamme jïh nuhtjeme. Mijjieh göökte sjïere histovrijen tsiehkieh veeljeme, gusnie gyhtjelasse aalkoeåålmegi jallh nasjonaalestaaten dåehkieektiedimmien bïjre lea joekoen sjyöhtehke orreme. Voestes tsiehkie lea boelhke aktijve assimileereminie/segregeereminie saemijste dejnie skandinavijen nasjonaalestaatine. Mubpie tsiehkie lea boelhken 1939-1945 gosse veartenedåara jïh ritneme joekoen tjarke tjoevkesem gyhtjelassese bïeji årroji nasjonaale identiteeten bïjre.
Ulmie prosjektine lea analyseeredh guktie åarjelsaemien identiteete jïh mojhtese leah sjugniesovveme tïjje doekoe rååresjimmiej tjïrrh aalkoeåålmegedåehkien jïh daaroen jienebelåhkoeårroji gaskem. Mijjieh gihtjebe: Guktie lea daejtie göökte laejhtehks heannadimmide åarjelsaemien histovrijisnie guarkeme, toelhkestamme jïh nuhtjeme åssjalommes buektedh åarjelsaemien identiteeten bïjre, mejtie lea åarjelsaemien seabradahken sisnjelen jallh stoerreseabradahken bïjre ålkolen?
Prosessh, dååjrehtimmieh jïh vaastahtahke åarjelsaemien seabradahkesne ektiedimmesne vuajnalgieh jïh viertiestamme sjidtieh jeatjah saemien seabradahkigujmie, jïh plearoeh prosesside jïh haestiemidie mejtie jeatjah aalkoeåålmegh leah dååjreme Canadasne jïh USA:sne.
Edtjebe sïjse tjöönghkedh jïh analyseeredh golme åejviesåarhth daatematerijelleste: kvalitatijve gihtjehtimmieh, histovrijen våarhkoegaaltijh jïh historiografihken teeksth, soptsesh jïh analyjsh. Teorijen mietie prosjekte aajkojne åtna pruvvieh tseegkedh daajbaaletje mojhteseteorijen jïh aalkoeåålmegegoerehtimmiej gaskem.
Lohkh vielie prosjekten bïjre daesnie:
Bielieprosjekte
Assimileeremeprosessh: Åarjelsaemien dååjrehtimmieh jïh vuastalimmiestrategijh